ROXAS CITY – Gindepensahan ni Capiz vice governor Jaime ‘Mitang’ Magbanua ang legislative department sang gobyerno-probinsiyal natuhoy sa matuod-tuod nga rason sang ila wala pag-aprubar sang Annual Investment Plan (AIP) 2020.
Ini ang nangin sentro sang diskurso-pribilehiyo sang bise-gobernador sa sesyon sang Sangguniang Panlalawigan kasunod sang nakalab-ot sa iya nga impormasyon natuhoy sa ginapahayag ‘pagpatalang’ sang Kabalaka Information Center, ang media bureau sang gobyerno-probinsiyal, sa mga tawo pinaagi sa pagpalapta nga ginapunggan sang SP ang pag-aprubar sang annual budget.
Suno kay Magbanua, dapat mahibaluan sang tawo ang matuod-tuod nga rason kun ngaman tubtob subong wala pa maaprubahan ang pondo sang gobyerno-probinsiyal.
Apang nakibot ang bise-gobernador sang may nakahinala siya nga pila ka mga opisyales kag pumuluyo sang mga kabaranggayan sa mga banwa sang Panay kag Sigma kun sa diin kasubong ginabasol ang SP sa wala pag-aprubar sang pondo sang gobyerno-probinsiyal nga nagaapekto sa pila ka proyekto sa ila lugar.
Sang gin-usisa ni Magbanua, nahibaluan sini nga ang nasambit nga media bureau ang nagapalapta sang amo nga impormasyon nga suno sa iya kabaliskaran sa dapat kuntani nila nga trabaho.
Sa baylo kuntani nga sila ang magadepensa, sila pa ang nagapalapta sang wala kamatuoran nga impormasyon nga nagapatalang sa tawo.
Apang gilayon nga ginpaathagan ni Magbanua ang nasambit nga mga indibidwal natuhoy sa matuod nga rason sang wala pag-aprubar sang annual budget.
Ginpanindugan ni Magbanua nga ginahimo lamang sang SP ang ila nga trabaho kun sa diin ila ginpabalik sa executive department ang AIP 2020 kasunod sang ila natukiban nga mga duplikasyon sang pondo.
Gindugang pa sini nga nasandig sa ila mandatu nga tun-an sang husto ang mga proyekto kag pondo sang gobyerno-probinsiyal.
Ginpanindugan sang bise-gobernador nga indi mahimo nga magpangibabaw ang kabutigan sa kamatuoran gani apelar sini nga dapat lunsay kamatuoran lamang ang ginapahayag kag ginapahibalo sa mga pumuluyo.
