ROXAS CITY – Posible nga wala mapreparahan sang pamunuan sang Roxas Memorial Provincial Hospital ang mangin epekto sang bagyo Ursula sa operasyon sang nasambit nga ospital nga nagresulta sa pagkapatay sang apat ka mga pasyente sa sulod sang Intensive Care Unit (ICU).
Ini ang ginpahayag ni Capiz vice-governor Jaime Mitang Magbanua sang mainterview sang Bombo Radyo.
Suno kay Magbanua nga hugot ang iya nga pagpati kaupod ang provincial board nga wala ginalauman sang pamunuan sang ospital ang nangin epekto sang bagyo sa ila operasyon.
Matandaan nga una na nga ginpanindugan sang pamunuan sang ospital nga wala sang kahilabtanan ang pagkaguba sang generator set sang ospital sang nadulaan sang kuryente ang probinsiya sang nagluntad ang bagyo sa kamatayon sang apat ka mga pasyente.
Apang suno kay Magbanua nga magapatigayon sang separado nga imbestigasyon ang provincial board angut diri.
Ginpahayag sini nga mayorya sa mga miyembro sang konseho ang nagapabor nga dapat nga imbestigahan ang natabo agud mahibaluan kun ano ang matuod nga rason sang kamatayon sang nasambit nga mga pasyente.
Matapos ang ila nga imbestigasyon suno kay Magbanua, ila man nga solusyunan kun ano ang makit-an nila nga nangin problema agud indi na masulit pa ang nasambit nga hitabo.
