ROXAS CITY – Ginkompirmar ni Vice Governor James Mitang Magbanua nga magapatigayon sila sang maidid nga imbestigasyon matapos nga nagpadala na sang reklamo sa Sangguniang Panlalawigan ang iloy ni Ms. Universe Philippines Capiz Candidate Mariam Lara Ashraf.
Sa interview sang Bombo Radyo kay Magbanua ginpahayag sini nga tutukan gid sang tanan nga mga board members ang nasambitan nga isyu.
Ginpasalig man ni Magbanua sa publiko nga mapalab-ot gid ini sang Sangguniang Panlalawigan sa mga natungdan ang amo nga reklamo agud mabal-an kun sin-o ang may yara sang kakulangan pag-abot diri nga isyu.
Nahibaluan nga nagpadala na sang Formal Complaint ang iloy sang amo nga kandidata nga si Marites agud i-reklamo ang MUP-Capiz Organizers nga ginalakipan nanday Cocoy Vidal, Charly Distor kag Jonathan Lomogdang.
Apang, ginapanotaryuhan pa ini sa mag-iloy agud mabal-an kun matuod ang reklamo kag mga alegasyon.
Kasunod sini magapatigayon sang Committee Hearing ang Sangguniang Panlalawigan sa tion nga matapos na ang pagnotaryo sa nasambit nga letter complaint kag pagasugoran na ang imbestigasyon sa natabo sa kandidata.
Samtang, igapatawag naman ang tatlo ka mga nasambit nga organizers ni Ashraf agud mabatian man ang bahin sang tagsa ka kampo.
Matandaan nga nangin kontrobesiyal sa probinsya ang isyu kasunod sang pag-atras ni Mariam sa amo nga kumpetisyon kun sa diin ginaalegar ginpabay-an ini sang iya mga handlers kag ang isyu nga pagbugaw sa amo nga kandidata.
