ROXAS CITY –Handa nga atubangon ni Vice Governor James Mitang Magbanua ang panumbungon nga igapasaka sa iya ni Board Member Eliuper Martinez sa ombudsman matapos nga wala sini ginpirmahan kag ginkwestyon ang Representation Allowance and Transportation Allowance ukon RATA.
Ini ang ginpahayag sang bise gobernador sang mainterview sang Bombo Radyo.
Suno kay Magbanua nga nagasunod lamang ini sa tama nga proseso bilang signatory.
Samtang, may kaangtanan diri magapatigayon sang close door meeting ang Sangguniang Panlalawigan karon sa hapon para hinalaan ang mga issue kag iresolbar ang mga problema sa mga board members.
Ginpahayag ni Magbanua nga kinahanglan nga magpatigayon sang sinapol ang Sangguniang Panlalawigan agud mahitsu ang indi pag-intiendihanay sa tunga sang mga board members partikular na sanday Board Member Eliuper Martinez kag Matt Hachuela.
Magluwas diri, ginkompirmar niya man nga wala sang may nagluntad nga kinagamo sang nakaligad nga session.
Gin-athag man sini nga nagarespetuhanay ang isa kag isa kun sa diin ginpamatian sini ang tagsa ka bahin nga luyag ipabutyag sang mga board members.
Dugang pa sini nga wala man sang may nagluntad nga kinagamo kag wala man sang kamatuoran ang mga nagalapta nga issue nga nagtinaasay sila tingog sang pila ka mga board members.
Samtang, nagpasalig naman ang bise gobernador nga mahitsu na ang tanan nga problema kag kuntani magtambong ang tanan nga mga board members.
