ROXAS CITY – Hugot nga ginpanindugan ni Vice Governor Jaime ‘’Mitang’’ Magbanua nga wala ini sang nabaton nga pagpanawag gikan sa Roxas Memorial Provincial Hospital ukon RMPH sang panahon nga nagkaangkon sang problema sa pag trip off sang generator set sang naglaslas ang bagyo Ursula.
Ginkumpirmar ni Vice Governor Magbanua nga siya ang acting governor sang naglaslas sang bagyo Ursula apang wala ginpahibalo sang RMPH nga may problema na ang generator set nga ginabasol sa pagkamatay sang apat ka pasyente nga yara sa Intensive Care Unit sang amo nga ospital.
Suno kay Magbanua nga nahibal-an na lamang sini kay Engr. Edgar Agana nga nagapangita sang generator set, matapos nga makaangkon sang trouble sa diin ginmanduan na lamang sini ang provincial engineer nga pangitaan sang medyos.
Wala man ini sang ideya sa nagkalamatay nga mga pasyente sa Intesive Care Unit kag nahibaluan lamang ang natabo sang nagpadulong sa banwa sang Panay sang Disyembre 25, 2019.
Ginapanindugan man ni MAgbanua nga unfair nga basulon ini sa natabo, bangud ginhimo sini ang iya masarangan santu man sa iya kapasidad nga nagserbe sadto bilang gobernador sang probinsiya samtang wala si Governor Esteban Evan Contreras II.
