ROXAS CITY – Wala sang may ginadampigan nga miyembro sang Sangguniang Panlalawigan ang bise gobernador sang Capiz.
Ini ang gin-athag ni Vice Governor Jaime ‘Mitang’ Magbanua natuhoy sa pila ka mga alegasyon ni board member Atty. Eleuper ‘Bulilit’ Martinez, angut sa nangin botohan nga natabo sa session sang Sangguniang Panlalawigan kag sa wala pagpahanugot sa iya nga magdul-ong sa iya privilege speech, sang mainterview sang Bombo Radyo.
Suno kay Magbanua, ginarespeto sini ang opinyon kag panan-awan ni Martinez nga luyag sini igadeklarar nga ‘null and void’ ang nangin desisyon sang Sanggunian nga magpapasar sang resolusyon nga magapasaka sang panumbungon batuk kay Governor Esteban Evan Contreras, Provincial Administrator Edwin Chinel Monares kag RMPH OIC Dr. Edmarie Tormon.
Ginkumpirmar man sini nga nagrequest sang executive session si board member Martinez nga nagasugot si Governor Esteban Contreras nga magpakig dayalogo sa bisan sin-o nga miyembro sang Sanggunian.
Ginpadala pinaagi sanday budget officer Tony Arbis kag Mr. Boy Apaap, kag ginhinalaan nga indi kuntani pagdayunon ang ginpapasar nga resolusyon agud nga iga-release ang gina-request nga budget sang mga board members.
Apang, suno diri, mabudlay na nga ibalik ang pagsalig nga naguba rason nga ginbalibaran sini ang offer.
Sa pihak sini, nagapati ang bise gobernador nga maabot ang tion nga magatahaw ang tensyon sa duha ka departamento.
