ROXAS CITY – Ginpahayag ni Vice Governor Jaime ‘Mitang’ Magbanua nga wala ini sang ‘abuse of power’ matapos ang ginhimo sini nga tikang sa pagpapanug sang memorandum natuhoy sa bakante nga posisyon sa opisina sang Sangguniang Panlalawigan.
Sa interview sang Bombo Radyo kay vice governor Magbanua, ginsiling sini nga indi na ini luyag pa nga magdako pa ang isyu bangud bisan ang provincial director sang Civil Service Commission nga si Mr. Rufino Leonoras ang nagpahayag nga wala ini may gin-bayular bangud ang ginhimo nga tikang ni Magbanua ang nakasaad sa Omnibus guidelines sang ahensya.
Dugang pa sini, nga antes paman ang pagpapanaug sini sang ‘memo’ nakapangunseho ini sa CSC sang nagakaigo nga pagahimuon.
Nahibaluan nga may kaangtanan ini sa pag-isyu sang bise gobernador sang memorandum order sa Human Resource Management Office (HRMO) sa pagpatigayon sang screening sa aplikasyon sa posisyon nga Administrative Assistant IV para sa opisina sang Sangguniang Panlalawigan.
Matandaan nga nangin kontrobersyal ang ini nga tikang sang bise gobernador bangud sa ginaalegar gintapakan sini ang bulohaton sang isa ka gobernador.
Sa pihak nga bahin, wala man sang kalain sang buot si Magbanua sa nangin pahayag sang suno sa diri, mga halangdon nga pulitiko, sa nangin press conference sang Gobernador kaupod ang League of the Municipalities (LMP) President-Capiz Chapter, kun sa diin gintawag ini nga b*ndol.
Suno sa bise gobernador, wala sa batasan sini nga magpaguwa sang binastos nga pahayag bangud nagapati ini nga indi na mabalik pa ang mga ginapangbuy-an nga tinaga sa isigkatawo.
