ROXAS CITY – Ginkompirmar ni Capiz Vice Governor Jaime “Mitang” Magbanua nga nagnegatibo ini sa COVID-19.
Sa interview sang Bombo Radyo Roxas kay Magbanua ginpahayag sini nga nakabaton ini sang mensahe gikan sa Capiz Provincial Health Office nga nagnegatibo ang resulta sang iya Real Time Polymerase Chain Reaction (RT-PCR test).
Gindugang pa ni Magbanua nga kalakip sa nagnegatibo amo sanday Board Member Thea Faith Reyes kag Board Member Sonny Besa samtang ginahulat pa ang resulta sang RT-PCR test nanday Board Member Elmer Arevalo kag Provincial Sangguniang Kabataan President Renzo Teves.
Ginpahayag ni Magbanua nga naghinyo ini sa PHO nga makaguha na ini agud makabalik sa trabaho apang ginpanugyanan ini nga kinahanglan tapuson anay ang iya sini nga 14-day quarantine.
Bangud diri ginlab-ot sini ang walo ka mga Board Members agud magpatigayon sang sesyon apang indi available ang halos kadam-an.
Nagapati naman ini nga sa madasun nga semana mahimo na ini makabalik sa trabaho bangud sa pagtakop sang iya nga quarantine.
Nagpahanumdom man ini nga kinahanglan gid nga tumanon ang ginapatuman nga mga health minimum protocols sang mga otoridad agud malikawan ang pagduging sang nasambitan nga virus.
