ROXAS CITY – Naghatag sang sabat si Capiz Vice-Governor Jaime ‘Mitang’ Magbanua natuhoy sa pahayag ni Board Member Eleuper ‘Bulilit’ Martinez nga kuntani wala nalang indi nagpapili sa pagkabise-gobernador kun mas ginapasulabi sini ang iya pagka-presidente sang Grains Retailers Confederation (GRECON).
Ini ang kasunod sang pagkompirma ni Magbanua nga indi ini makatambong sa Executive Legislative Agenda (ELA) sang gobyerno-probinsiyal nga patigayunon sa Davao City bangud may pagatambungan man ini nga sinapol sang GRECON.
Suno kay Magbanua nga indi mahimo nga papilion siya sa duha ka butang bangud lunsay importante ini apang suno sa iya nga nahangpan sini ang iya dako nga responsibilidad bilang bise-gobernador.
Ginpahayag pa sang opisyal nga sang ginpadal-an siya sang imbitasyon sadtong Oktubre 3, iya ini ginbalibaran bangud may naka-schedule na ini nga sinapol nga kadungan sang (ELA) sa siyudad sang Davao.
Sa pagkamatuod suno kay Magbanua, wala sang nangin koordinasyon sa iya kag sa iban nga miyembro sang Sangguniang Panlalawigan ang pagplano sang (ELA) kag suop na sila ginpahibalo natuhoy diri rason nga ang iban sa ila ang indi makatambong bangud man sa ila tagsa ka mga prior commitments.
Gindugang pa sang opisyal nga kun indi man sila makatambong sa (ELA) sa Davao City, wala ini nagapatimaan nga wala sila nagakooperar sa gobernador.
Natabuan lang gid suno sa iya nga indi man mapaiway ang ila tagsa ka mga lakat.
Bangud diri suno kay Magbanua, sa tion nga makabalik sa probinsiya ang mga board members nga magatambong sa (ELA), liwat nila ini nga talakayon sa Sangguniang Panlalawigan.
