Ginpaathagan ni Vice Mayor Braulio Godfrey Asis ang mga empleyado kag tanan nga opisyales sang President Roxas sang rason sang iya temporaryo nga pagpungko bilang acting Mayor sang banwa kasunod sang pagsuspendi kay Mayor Receliste Escolin sa sulod sang tatlo ka bulan.
Suno kay Asis, ang bag-o nga katungdanan ang indi niya luyag apang wala ini sang mahimo bangud ini ang bise-alkalde kag obligasyon sini nga dumalahan ang bug-os nga banwa pananglitan wala ang alkalde.
Pahayag ni Asis, sa iya temporaryo nga pagpungko wala ini sang pagabag-uhon apang ginasiguro sini nga magapadayon ang pag-asenso sang banwa sa bulig sang tagsa-isa.
Bangud sini, nagapangayo sang bug-os nga suporta kag kooperasyon si Asis sa mga empleyado kag opisyal ilabi na nagahilapit na ang kapistahan sang banwa amu man ang Capiztahan 2024.
Matandaan ginpapanaugan sang suspension order sang Office of the Ombudsman si Mayor Escolin bangud sa paglapas sa Republic Act 7160, Section 96 sang Local Government Code ukon Simple Misconduct.
