ROXAS CITY -Ginkasubo ni Roxas City Vice Mayor Erwin Nonoy Sicad ang natabo nga pagpanunto sang wala matumod nga mga indibidwal sa isa ka kalan-an sa Barangay Baybay sining siyudad matapos nga gingamit ang iya sini nga pangalan.
Ini ang ginapahayag ni Vice Mayor Erwin Nonoy Sicad sang mainterview sang Bombo Radyo.
Ginpahayag ni Sicad nga duha ka mga dalagkuan nga mga kalan-an sa siyudad ang nagtawag sa iya matapos nga gingamit ang iya nga pangalan sa pag-order sang pagkaon.
Suno kay Sicad nga una nga nagtawag sa iya ang isa ka kalan-an sa Pueblo De Panay kag ginapakompirmar ang gin-order sini nga mga pagkaon para sa iya nga mga bisita nga katapo naman sang DOH.
Ginpanginwala naman ni Sicad nga nag-order ini sang pagkaon sa nasambit nga kalan-an.
Makaligad sang pila ka minutos, liwat nga may nagtext sa iya nga tag-iya sang kalan-an sa Barangay Baybay sining siyudad kag ginapakompirmar man ang ginpaluto sini nga mga pagkaon para sa 18 ka mga indibidwal, apang ginpanginwala man ini sang nasambit nga bise alkalde.
Magluwas diri, nagpangayo man sang load ang nasambit nga suspetsado sa staff sang nasambit nga kalan-an.
Bangud sini, ginkaalarma sang bise alkalde ang natabo matapos nga nagpadulong sa Roxas City Police Station ang mga staff sang kalan-an agud nga magpabalhag sang reklamo.
Nagapati si Sicad nga wala sang iban nga katuyuan ang mga suspetsado kundi ang makapanunto kag makapangwarta sa publiko.
Samtang ginkompirmar naman ni Sicad nga makapila ka beses na gingamit ang pangalan sini sa nasambit nga mga modus operandi.
Ginabulubanta nga masobra P19,000 ang gintuga nga kapyerdehan sa nasambit nga kalan-an.
