ROXAS CITY – Ginpanginwala sang vice mayoralty candidate sa banwa sang Maayon ang akusasyon nga ginpatuto sa iya ni anay SB member Wildie Duronio nga siya ang yara sa likod sang nagalapta nga balita nga ginbayaran ang nasambit nga pamilya agud i-withdraw ni incumbent SB member Kimberly Duronio ang iya kandidatura sa maabot nga eleksyon.
Suno kay Noel ‘’Dodoy’’ Diestro nga wala ini sang kamatuoran kag may lamud pamultika lamang ini sa diin ang tuyo nga gub-on ang iya nga pangalan.
Dismayado man ini sa ginhimo nga tikang ni Duronio nga pagpalapit sa nagapapili nga alkalde sang Maayon kag paghinyo nga mahatagan sang trabaho ang iya anak bangud klaro nga mas ginauna pa sini ang personal nga interes sang ila pamilya sa baylo sa interes sang mga pumuluyo.
Wala man gintago ni Diestro ang paglain sang iya buot kay Duronio, bangud madugay sila nga nag-updanay sa kampanyahanay antes nagtext nga indi na siya magpadalagan.
Samtang ginbalik sini kay Duronio ang tinaga nga desperado bangud indi siya ang desperado kundi ang anay SB member nga ginbaylo ang pagserbisyo sa mga pumuluyo sa interes sang ila pamilya.
