ROXAS CITY-Viral karon sa social media ang isa ka video nga makita ang pagsumbag sang isa ka tomboy sa isa ka babayi sa Barangay Tacbuyan, Estancia Iloilo.
Sa nasambit nga video nga nagalawig sang masobra 3 ka minutos makita ang isa ka ginapahayag tomboy kag isa ka dalagita nga nagabayluhanay sang mga malain nga tinaga nga ginapalibotan sang madamo nga mga kabataan sa isa ka wala matapos nga istruktura.
Apang sang ulihe napikon ang nasambit nga tomboy kag ginsumbag sang makatatlo ka beses ang nasambit nga dalagita nga naigo sa iya sini nga guya.
Sa tuman ka kusog sang sumbag sang tomboy, hinali na lang nga nalipong ang dalagita nga gindala papauli sang iya mga kaupdanan.
Sa interview sang Bombo Radyo sa kay Punong Barangay Sancho Navarro, Punong Barangay sang Barangay Tacbuyan, Estancia Iloilo ginkompirmar sini nga dira mismo sa nasambit nga barangay natabo ang insidente.
Apang gin-athag ni Navarro indi mga residente sa amo nga barangay ang duha ka mga
imbolbado.
Ginpahayag ni Navarro nga ang ginsumbag nga dalagita ang residente sang Barangay Paon samtang ang tomboy naman nga nagsumbag sa biktima ang residente sang Zone 2, Barangay Poblacion sang nasamnbit nga banwa.
Suno sa kay Navarro nga sang tinalikdan nga miyerkules nga adlaw natabo ang insidente apang ulihe na sila nakahibalo sa natabo matapos nga may yara sang nagpalab-ut sang impormasyon sa iya natuhoy sa nasambit nga kinagamo.
Gintinguhaan pa suno diri nga respondihan sang mga tanod ang natabo apang wala na ini nila maabtan ang nasambit nga mga kabataan.
Gindugang pa sini nga ginpalab-ut na sa mga natungdan nga mga barangay officials ang natabo sa nga insidente.
Suno sa kay Navarro nga ginreklamo sang dalagitai ang nasambit nga tomboy sa ila sini nga barangay kasunod sang pagtapungol sini sa iya.
Ginpasalig ni Navarro nga bantayan ang nasambit nga lugar agud indi na masulit pa ang amo nga insidente.
Sa dugang nga pagpangusisa sang Bombo Radyo nga nag-ugat ang tanan sa inaway sang mga kabataan sa facebook group nga “Online Suntukan”.
Sa karon padayon pa nga ginahibalo sang mga kapulisan ang administrator sang nasambit facebook group.
Mahibaluan nga ang dalagita nga ginsumbag ang nagapang-edaron sang 14-anyos samtang tomboy naman ang napang-edarons ang 22-anyos.
Ginapahayag nga lain nga mga persona ang dapat maaway sa nasambit nga lugar apang sa ulihe sila nga duha ang nagkinagamo.
