ROXAS CITY – Gina-estoryahan sa karon ang video sang duha ka mga lalaki nga nagabayluhanay sang sipa kag inumol sa isa ka bakante nga lote sa Roxas City nga ginalantaw kag ginapustaan pa sang mga tawo sa pihak sang ginapatuman nga community quarantine.
Sa ginpadala nga video sa Bombo Radyo Roxas, makit-an ang ‘sparring’ sang duha ka mga lalaki nga wala sang pang-ibabaw nga panapton kag napalibutan sang nagasinggitan nga mga manuglantaw.
Kuha ang nasambit nga video sa isa ka bakante nga lote sa Sitio Nasagud, Barangay Bolo, Roxas City.
Sa nakuha nga impormasyon sang Bombo Radyo, nahibaluan nga ginapustaan pa ang ‘sparring’ sang nasambit nga mga indibidwal.
Matapos ginpakigbahin sang Bombo Radyo ang nasambit nga video sa Facebook page, nagpanawagan ang pila ka mga indibidwal sa lokal nga gobyerno sang siyudad nga gilayon ini nga aksiyunan.
