Ginpaambit sang content creator nga si Vinz Jimenez ang mga leksyon nga iya natun-an matapos ang kontrobersyal nga video nga iya gin-upload sang Disyembre, sa diin gin-akusahan niya ang iya ex-girlfriend nga nagapangluib.
Suno kay Jimenez, indi niya tuyo nga mangin sikat kundi nga mapasanyog ang ihibalo tuhoy sa cheating issue kun relasyon ang pagahambalan.
Sa isa ka interview, ginpahayag ni Vinz nga iya gin-delete ang nasambit nga video, apisar nga nagalapta pa ini sa social media matapos nga na-save sang pila ka mga netizens. Nangin meme man sa social media ang pila sa mga pahayag sang iya ex-girlfriend sa video.
Suno kay Jimenez, ginhimo niya ini agud nga ma-engganyo ang mga tawo nga mangin tampad sa ila relasyon kag likawan ang pagpanunto.
Gin-ako man sang content creator nga posible nabulag siya sang paghigugma rason nga wala niya gilayon natalupangdan ang “red flags” sa ila relasyon.
Pahayag pa ni Jimenez, natun-an niya nga mangin mas mahinalungon sa relasyon subong kag mas importante nga hibaluon sang lubos ang background sang isa ka tawo lakip na ang pamilya, mga abyan, kag bisan ang mga kaupod sa trabaho.
Sa pihak sang mga kritisismo nga iya nabaton, ginpanindugan ni Jimenez nga wala siya sang paghinulsol sa pag-upload sang video, apang ginpasalig sini nga ini na ang katapusan nga tiun nga ma-share niya ang kaangay sini nga sahi sang personal nga eksperyensya online.
