Ginpaidalom sa Red Alert kag Yellow Alert ang Visayas Grid bangud sa kakulang sang available power supply sa rehiyon.
Sa interview sang Bombo Radyo kay Reagahn Alcantara, Lead Specialist sang National Grid Corporation of the Philippines ukon NGCP, iya ginpahayag nga mag-umpisa ang Red Alert alas-1:00 sang hapon tubtob alas-10:00 sang gab-i, samtang ang Yellow Alert maga-umpisa alas-10:00 sang aga tubtob alas-1:00 sang hapon.
Ang Yellow Alert ginapatuman kon manipis ang operating margin kag indi bastante ang reserba sang kuryente para sa kinahanglanon sang grid.
Samtang, ang Red Alert ginapatuman kon mas manubo ang available power supply kumpara sa demand ukon konsumo sang publiko, nga mahimo magresulta sa rotational brownout kon indi mabuhinan ang demand.
Bangud sini, ginapanugyanan ang mga konsumidor sa rehiyon nga magtipid kag mag-conserve sang kuryente, ilabi na sa gintalana nga alert hours.
