Ginpaidalom sang National Grid Corporation of the Philippines (NGCP) sa Yellow Alert kag Red Alert status ang Visayas Grid subong nga adlaw bangud sang kakulang sang reserba sang suplay sang kuryente sa rehiyon
Sa interview sang Bombo Radyo, Mr. Reagan Alcantara, Lead Specialist sang NGCP, iya ginpahayag nga ang Red Alert amo nag kulang nga reserba sang kuryente halin sa mga available nga planta samtang ang yellow alert amo ang manipis nga reserba sang kuryete sa rehiyon.
Suno kay Alcantara, ang available capacity sa rehiyon ang yara sa 2,561MW kag ang Peak Demand naman ang yara sa 2,568MW.
Nahibaluan nga ipatuman ang Red Alert status halin alas-5:00 sang hapon tubtob alas-7:00 sang gab-i.
Samtang, ang Yellow Alert status ipatuman halin alas-3:00 tubtob alas-5:00 sang hapon kag alas-7:00 tubtob alas-10:00 sang gab-i.
Nagalaum ang NGCP nga magabalik sa normal ang sitwasyon sang suplay sang kuryente sa Visayas sa tion nga magdugang liwat ang kapasidad sang mga planta nga naga-operate sa rehiyon.
