Liwat nga ginpaidalom sa Red Alert kag Yellow Alert ang Visayas Grid bangud sa kakulang sang available power supply kun ipaanggid sa peak demand subong nga Huwebes.
Sa interview sang Bombo Radyo kay Mr. Reagahn Alcantara, Lead Specialist sa Public Relations Department sang National Grid Corporation of the Philippines (NGCP), iya ginpahayag nga ang Red Alert ipatuman humalin ‘las-5 sa hapon tubtob ‘las-8 sa gab-i, samtang ang Yellow Alert ipatuman halin ‘las 2 sa hapon tubtob ‘las 5 sa hapon kag ‘las-8 sa gab-i tubtob ‘las 9 sa gab-i.
Suno kay Alcantar, may yara sang 2,344 megawatts (MW) lamang nga available capacity ang grid, samtang ang peak demand ukon pinakataas nga kinahanglanon sa kuryente yara sa 2,452 MW.
Isa sa mga rason sang alert status amo ang indi pag-operate sang pila ka daku nga coal plants sa Visayas, lakip ang TVI 1, TVI 2 kag KSPC 1.
Limitado man ang power import halin sa Mindanao.
Dugang sang natungdan, may yara sang siyam ka power plants nga naka-forced outage, samtang 16 ka planta ang naga-operate sa mas manubo nga kapasidad.
Ang Red Alert ginapaguwa kun indi bastante ang power supply para masabat ang kinahanglanon sang mga consumers kag ang kinahanglanon sang transmission grid.
Samtang, ang Yellow Alert ginapaguwa kun kulang ang operating margin para masabat ang kinahanglanon sang transmission grid kun may matabo nga problema ukon hinali nga pagkadula sang isa ka power source.
