Magapatigayon sang “Regional Legislative Immersion & Parliamentary Excellence Derby” ang Vice Mayors’ League of the Philippines (VMLP) Region 6 kaupod ang Department of the Interior and Local Government (DILG) Region 6 sa Antique sa Oktubre 1 kag 2, 2026.
Sa interview sang Bombo Radyo kay Lambunao Iloilo Vice Mayor Arvin Losaria, presidente sang Vice Mayors’ League of the Philippines, iya ginpahayag nga tinutuyo sang aktibidad nga mapasangkad ang kaalam kag kapasidad sang mga miyembro sang Sangguniang Bayan, Sangguniang Panlungsod kag Sangguniang Panlalawigan sa legislative work.
Suno kay Losaria, isa ini ka oportunidad agud mapakita sang mga konseho sa publiko ang ila mga ordinansa, resolusyon kag legislative priorities nga may kaangtanan sa kauswagan sang ila tagsa ka lugar.
Nahibaluan nga ang magadaug sa regional level sa amo nga aktibidad may kahigayunan nga makabaton sang premyo ukon proyekto nga igapatuman para sa ila tagsa ka banwa ukon syudad.
