Padayon ang pagpaandam sang Philippine Institue of Volcanology and Seismology sa publiko batuk sa naobserbahan nga vog nagikan sa bulkang Taal sa Batangas.
Ini matapos ang padayon nga degassing activity sang bulkan nga nagresulta sa maaso nga kondisyon sa mga kaiping nga komunidad dala sang volcanic smog ukon vog nga nagresulta sa suspensiyon sang mga klase subong nga Lunes.
Base sa monitoring sang ahensya sa nakaligad nga 24-oras, nagbuga ang bulkan sang 3,355 nga tonelada kada adlaw sang asupre sumugod pa sadtong Agosto 15.
Bangud sini, posible nga magresulta ini sang iritasyon sa mata, tutunlan kag respiratory tract ilabi na sa mga may pre-existing health conditions kaangay sang asthma, sakit sa baga, tagipusuon ilabi na sa mga katigulangan, mga nagabusong kag kabataan nga madugay ang exposure sa asupre nagikan sa bulkan.
Gin-abisuhan man ang mga residente nga apektado sang vog nga magsukdok sang facemask, mag-inum sang madamo nga tubig agud malikawan ang anu man nga iritasyon sa tutunlan.
Subong man ginpanugyanan ang vulnerable sector nga magpakonsulta sa doktor ukon barangay health unit kung kinahanglan ilabi na kung seryoso na ang epekto sini sa ikaayong lawas.
