Gin-anunsyo sang Department of Justice nga posible mabuhinan ang silot nga ipatuman sang korte sa contractor nga si Sarah Discaya sa kaso nga iya ginapangatubang may kaangtanan sa flood control.
Suno kay Prosecutor General Richard Anthony Fadullon, ang boluntaryo nga pagsungka ni Discaya sa National Bureau of Investigation ang mahimo ikonsiderar sang korte angut sa silot nga ipatuman sini.
Dugang pa ni Prosecutor General Fadullon, ang boluntaryo nga pagsungka sa hurisdiksyon sang korte ang nagapakita nga indi na siya maghulat sang pag-issue kag pagserbe sang ‘warrant of arrest’.
Madumduman nga boluntaryo nga ginsungka ni Sarah Discaya ang iya kaugalingon sa kustodiya sang National Bureau of Investigation sang Martes, Disyembre 9.
Nahibaluan nga gin-issue ang arrest warrant matapos ginpasakaan ini sang kaso nga graft kag malversation sang Office of the Ombudsman.
Nag-ugat ini sa iya pagka-ivolved sa ‘ghost flood control project’ sa Davao Occidental nga ginpondohan sang halos 100-million pesos apang wala na sang makita humalin sang ginpatigayon ang inspeksyon.
Apang gin-ako ni Prosecutor General Fadullon nga wala sila nakahibalo sang rason kon ngaa nagdesisyon ang kampo ni Discaya nga boluntaryo nga magsungka.
Magluwas sa ginasiling nila nga kahadlok para sa kaluwasan sang kontraktor, indi man sila sigurado kun sa diin ukon ano ang basehan.
