Dapat ibase sa kadamuon sang mga senador nga magatambong sa Senate Impeachment Court ang voting threshold sa impeachment trial.
Sa interview sang Bombo Radyo kay Atty. Ephraim Cortez, President sang National Union of People’s Lawyers, nga nakasulat sa Konstitusyon nga two-thirds ukon 16 ka boto gikan sa 24 ka mga senator-judges ang kinahanglan agud mapamatbatan ang isa ka impeachable official.
Suno kay Cortez, sa subong nga numero sang mga senador nga mahimo makatambong sa impeachment trial, mabudlay na nga malab-ot ang kasubong nga 16 ka boto.
Pahayag pa niya, may kaugalingon man nga gahum ang Senado sa pagbutang sang ila kaugalingon nga mga pagsulundan, lakip na ang pagdeterminar kon pila ka boto ang kinahanglan para sa isa ka conviction.
Nagalaum man ang natungdan nga mangin maathag ang pagsulundan sang Senado agud malikawan ang pagpatalang sa proseso sang impeachment trial.
