MANILA, Philippines – Ginbasol ni Vice President Sara Duterte si President Ferdinand Marcos Jr., kag ang iya administrasyon sa utang sang gobyerno kag pagsaka sang mga Pilipinong nga wala trabaho.
Sa iya pahayag sa The Hague, Netherlands sang Mayo 7, wala nagaobra sang maayo ang administrasyon ilabi na ang presidente.
Apang base sa report sang Bureau of Treasury ukon “BTr”, nagsaka sa P18.49 trillion ang utang sang gobyerno sang Marso halin sa P18.16 trillion sang Pebrero bangud sang pagnubo sang balor sang piso kontra dolyar.
Ginpahayag man sang ahensya nga nakaapekto sa utang ang ginpagwa nga global bonds sang gobyerno kag official development assistance gikan sa international partners.
Sa bahin naman sang employment, ginreport sang Philippine Statistics Authority ukon “PSA”, nga nagpabilin sa 5 percent ang unemployment rate sang Marso, mas manubo sa 5.1 percent sang Pebrero.
Suno sa PSA, nakaapekto sa employment ang seasonal changes ukon temporaryo nga pagnubo sang hiring pagkatapos sang holiday season.
Naapektuhan man ang sektor sang wholesale kag retail trade nga may kapin 900,000 nga nawad-an trabaho samtang P772,000 naman sa service kag sales sector.
Sa agrikultura kag forestry, nagnubo man ang employment bangud sang crop cycles nga nakaapekto sa kapin 1.4 million nga mga trabahador sa kabanwahanan.
Bilang sabat, ginpahayag ni Palace Press Officer Claire Castro, nga posible wala na updat si VP Duterte sa mga datos kag proyekto sang administrasyon.
Dugang pa ni Castro, nagsugod ang dako nga utang sang gobyerno sa panahon sang administrasyon ni anay Pangulong Rodrigo Duterte tuga sang COVID-19 pandemic.
Sa rekord sang gobyerno, nagsaka sa P9.795 trillion ang utang sang 2020 kag nagsaka sa kapin P11.7285 trillion sang 2021 antes ginturn-over kay Pres. Marcos Jr., ang P13.4189 trillion nga utang sang 2022.
Sa karon nahibaluan nga yara si VP Duterte sa The Hague agud bisitahon ang iya amay nga si anay Pres. Rodrigo Roa Duterte nga detenado sa International Criminal Court ukon “ICC”, bangud sang kaso nga crimes against humanity.
