Wala nagtambong si Vice President Sara Duterte sa ginpatigayon nga impeachment hearing sang House Committee on Justice, apang nakit-an ini nga yara sa pagbukas sang EXTRA+Ordinary: The Vice Presidents of the Philippines, isa ka pop-up exhibit sa Laguna.
Sa Kamara, ginpadayon sang mga mamalidha ang ika-apat nga public hearing batuk sa iya, nga nagatutok sa mga alegasyon sang indi husto nga paggamit sang confidential funds, wala mapaathag nga manggad, kag ginaalegar death threats batuk kay President Ferdinand Marcos Jr., First Lady Liza Araneta Marcos, kag anay House Speaker Martin Romualdez.
Ginpresentar man sang National Bureau of Investigation (NBI) ang ila findings sa sini nga mga alegasyon.
Ginalauman nga magaboto ang panel kun bala may yara sang posible nga kabangdanan para sa impeachment, nga mahimo magdala sang kaso sa plenaryo kag sa Senado.
Samtang nagabaskog ang panawagan sang Kamara, nagapabilin nga wala sa hearing si Duterte.
Suno sa iya kampo, ang mga reklamo sa impeachment wala sang iban kundi mga akusasyon nga gin-recycle kag kulang sang bastante nga factual basis.
Samtang ang bana sini nga si Atty. Manases Carpio, gindugang nga ang pagpaguwa sang ila bank records sa mga nagligad nga hearing ang naglapas sa Bank Secrecy Law, Data Privacy Act, kag Anti-Money Laundering Act.
Dugang pa, nga ang pagtambong sa Laguna exhibit ginpresentar bilang pagpadayon sang iya opisyal nga mga katungdanan kag mga pagpakig-angut sa publiko.
Ang exhibit nagapakita sang maragtas kag papel sang mga Bise Presidente sang Pilipinas, nga ginakabig sang iban nga isa ka pahayag nga nagapadayon ini sa iya mandato kag wala nagakabalaka sa mga alegasyon.
