Ginalauman nga magasumite sang sabat si Vice President Sara Duterte sa Lunes, Marso 16, sa duha ka impeachment complaints batok sa iya matapos gindeklarar nga yara na ini sa sufficient form and substance.
Suno kay House Committee on Justice member kag Bicol Saro Representative Terry Ridon, maga-expire na ang 10 ka adlaw nga ginhatag sang komitiba sa Bise Presidente subong nga weekend agud magsabat sa mga reklamo batuk sa iya.
Kon magsumite sang sabat si Duterte sa Lunes, hatagan nila sang tsansa ang bahin sang mga mamalidha nga nag-endorso sang mga reklamo sa impeachment kag hatagan man sang tsansa si VP Sara nga magsumite sang iya rejoinder.
Dugang pa ni Ridon, kun magsumite sang sabat ang Bise Presidente, igadeterminar sang Justice Committee kun “sufficient in grounds” ang mga reklamo sa impeachment kag ginalauman nga hiwaton ang hearing proper sa Abril 8.
Gin-athag man sang mamalidha nga mahimo mapalip-ot ang proseso sang impeachment bisan indi magsumite sang sabat si VP Sara sa Lunes.
Samtang, natalana naman sa Miyerkules, Marso 18 ang masunod nga hearing sang Justice Committee.
Pahayag pa ni Rep. Ridon, pagatalakayon man ang mosyon ni Rep. Chel Diokno angut sa posible conflict of interest sang duha ka abogado ni VP Sara nga sanday anay Education ASec. para sa Procurement Atty. Reynold Munsayac kag anay DepEd Spokesperson Michael Poa.
