Ginbatikos ni Vice President Sara Duterte ang pagserbe sang arrest warrant halin sa International Criminal Court (ICC) batuk kay Senador Ronald “Bato” Dela Rosa.
Suno sa Bise Presidente, ang warrant nga halin sa iban nga pungsod dapat anay ipresentar sa lokal nga korte sa Pilipinas antes ini ipatuman.
Ginpahayag ini ni Duterte sa isa ka interview sa The Hague, Netherlands, kun sa diin ginbisita niya ang iya amay nga si anay President Rodrigo Duterte nga nakadetain.
Suno sa iya, indi tama ang nasambit nga tikang batuk sa senador, kag iya ini ginpaanggid sa natabo nga pag-aresto sa iya amay antes ini ginpadala sa The Hague.
Matandaan nga ang ICC arrest warrant batuk sa anay Presidente ginpatuman sang Marso 2025 antes ini gindala sa The Hague matapos arestuhon kag i-hold sa Villamor Air Base.
Samtang, naglikaw naman si VP Sara sa pagkomento parte sa posible nga pagbag-o sa liderato sang Senado, kag iya ginpahayag nga ini ang yara sa desisyon sang mga senador.
