Gin-anunsyo ni Vice President Sara Duterte sang Sabado, Pebrero 21, nga sang nagligad pa niya nga tuig gin-recruit ang iya mangin running mate para sa 2028 presidential elections. Apang wala niya ginbuyagyag ang pangalan agud “maprotektahan” ang iya identity.
Matandaan nga sang Miyerkules, ginpahayag ni VP Sara nga magadalagan siya sa pagkapresidente sa 2028.
Ginpaathag man sini ang papel sang iya Vise presidente, kon magdaug siya, nga amo ang mangin responsable sa pagpanabat sa mga nakasala samtang nagatutok siya sa iya mga katungdanan bilang presidente.
Suno sa iya, wala man niya ginpahibalo ang iya amay nga si Former President Rodrigo Duterte sa iya temprano nga deklarasyon.
Ang iya lang asawa nga si Atty. Manases Carpio, mga kabataan, kag pila ka mga tinawo nga nagbulig sa pagsulat sang iya Tagalog speech ang nakahibalo.
Naglaong man niya siya sa iya iloy, nga si Elizabeth Zimmerman sa iya nga desisyon.
Ginpahayag man ni Duterte nga ginpakamaayo niya nga ipahibalo sang temprano bangud sa pagsinggit kag hingyo sang iya mga supporters.
Gintumod man niya ang nauna nga pahayag sang iya amay sang 2021 nga ang pagkapresidente “indi para sa mga kababainhan.”
Suno kay VP Sara, wala sang kahilabtanan ang gender sa ikasarang sang isa ka tawo sa pagpanguna sa pungsod.
