Ginpangapinan ni Vice President Sara Duterte ang iya amay nga si former President Rodrigo Duterte paagi sa pagpanindugan nga ang War on Drugs isa ka polisa sang gobyerno kag indi isa ka crimes against humanity.
Sa iya pahayag sa isa ka “Free Duterte” rally sa The Hague, Netherlands, iya ginhatagan pagtamod nga kabahin sang zero-tolerance policy sang gobyerno ang kampanya batok sa iligal nga droga kaangay sang “Oplan Tokhang”.
Suno sa iya, ang pagpatuman sini, maayo man ukon malain ang resulta, isa ka butang sang pagdumala kag indi isa ka krimen batok sa populasyon.
Ginpaanggid man ni Duterte ang isyu kun paano ginadulamahan ni President Ferdinand Marcos Jr. ang pungsod sa subong, nga mahimo nga maayo ukon malain nga pagdumala.
Dugang pa ni Duterte nga indi katumbas sang mga sala ukon indi maayo nga pagpatuman sang mga programa sang gobyerno ang crimes against humanity.
Ginkwestyon man ni VP Sara ang mga ebidensya nga gina-uyatan sang International Criminal Court (ICC). Suno sa iya, indi mapamatud-an sang mga imbestigador nga ang tanan nga mga tagreklamo matuodtuod nga biktima sang opisyal nga kampanya kontra droga.
Ginpabilin sini nga kon may yara sang sala ukon pag-abuso, ang mga lokal nga korte sa Pilipinas ang may jurisdiksyon kag ikasarang sa hearing sa sini nga mga kaso, indi ang ICC.
