Nagapanawagan si Vice President Sara Duterte nga manabat si President Ferdinand “Bongbong” Marcos Jr. kag mga katapo sang Kongreso sa pagpasar sang national budget para sa 2024 kag 2025, subong man ang pila ka mga probisyon sang 2026 General Appropriations Act (GAA), nga gindeklarar nga unconstitutional sang Korte Suprema.
Sa isa ka pahayag, ginpasalamatan ni Duterte ang Korte Suprema sa pag-uphold sang Konstitusyon kasunod sang desisyon sini angot sa irregular nga pagsaka sang unprogrammed appropriations nga nagsobra sa ginaproponer nga budget sang Presidente.
Kalakip sa mga gintumod sang Korte Suprema amo ang P449.5-billion nga dugang sa unprogrammed appropriations sa 2024 budget kag dugang nga P17.99 billion para sa Special Road Fund sang Department of Public Works and Highways sa 2025 budget. Gindeklarar man sini nga supak sa unconstitutional ang pila ka mga probisyon nahanungod sa unprogrammed appropriations sa 2026 GAA.
Suno kay Duterte, kinahanglan nga ipaathag ni Marcos kun ngaa ginpirmahan niya ang mga budget nga ginaalegar wala nagasanto sa proposal sang iya administrasyon.
Samtang, ginpahayag sang Malacañang nga pangabayon sini sa Korte Suprema nga liwat nga usisaon ang desisyon kag ginpanindugan nga ginsunod lamang sang Presidente ang nagaluntad nga mga pagsulundan.
