Nagapati si Vice President Sara Duterte nga target sang House of Representatives (HOR) nga i-impeach ini base na man sa nangin privilege speech ni Manila Rep. Rolando Valeriano.
Suno kay VP Sara, ang ginahimo nga hearing sang House Committee on Good Government and Public Accountability ang isa na ka tikang para sa impeachment sini.
Dugang pa, nga mismo si ACT Teachers Partylist Rep. France Castro ang nagsiling nga posible ma-impeach si VP Sara bangud sa mga kwestiyunable nga paggastos sang Office of the Vice President kag Department of Education.
Nangin mainit ang topiko natuhoy sa gingastos nga confidential funds ni Duterte.
Nag-atubang kahapon sa Komite si Duterte agud ipahayag ang iya nga ginabatyag.
Prangka man sini nga ginsiling sa komite nga indi target sang hearing ang misuse of funds, accountability ukon governance.
Nagapati ini nga ang tuyo sang amo nga hearing ang para samaran ini, ang iya imahe, ang OVP kag agud mauntat ang anuman nga political contest sa palaabuton.
Bangud sa kawalan sang bastante nga basehan, ginapauntat ni VP Duterte ang hearing. Apang, suno naman kay Rep. Chua ang chairman sang Komite nga indi nila mapauntat ang hearing bangud gin-aksyunan na sang mga ini ang nangin speech ni Rep. Valeriano.
