MANILA – Nagpahanumdom naman si Vice President Sara Duterte sa publiko nahanungod sa nagakaigo nga pagsunod sa mga kasuguan sa trapiko agud malikawan ang anuman nga sahi sang aksidente sa dalanon.
Ginhimo sang bise presidente ang panawagan kasunod sang narekord nga pagsaka sang mga aksidente sa dalanon nga imbolbado ang mga de-motor nga salakyan, partikular na ang nagluntad sa SCTEX kag NAIA.
Ini nga mensahe para sa Land Transportation Safety Month sa diin ginhatagan pagtamod sang bise presidente ang kinahanglanon sang mga motorista, pribado nga sektor, kag sang gobyerno nga magbinuligay agud masiguro ang kaluwasan sang mga motorista.
Suno kay VP Sara, indi lang trabaho sang mga road enforcer ang road safety.
Nagpanawagan man ini sa pribado nga sektor nga siguraduhon nga yara sa maayo nga kahimtangan ang ila mga driver kag magpaidalom sa maid-id nga paghanas kag seminar.
Base sa data, naglab-ot sa 11,000 ka mga Pilipino ang napatay sang 2021 bangud sa aksidente sa dalanon.
Kalabanan sa mga ini amo ang mga pedestrian, motorista, bisikleta, kag mga pasahero sang traysikol nga masami naga-edad 15-19 anyos.
