Ginendorso ni Vice President Sara Duterte, ang Senatorial Candidates sang Partido Demokratiko Pilipino (PDP) nga ginapamunuan sang iya amay nga si anay Pangulong Rodrigo Duterte sa palaabuton nga piniliay sa Mayo.
Ginhimo ni VP Sara ang pag-endorso pinaagi sa iya ginpadala nga mensahe nga ginbasa sang event host kadungan sang ginpatigayon nga proclamation rally sang Senatorial candidates sang PDP sa San Juan City.
Diri ginganyat sang bise presidente ang publiko nga iboto ang re-electionists Senators nga sanday Sen. Ronald Dela Rosa kag Bong Go, subong man ang aktor nga si Philip Salvador, mga abogado nga sanday Atty. Raul Lambino, Atty. Jesus Hinlo kag Jimmy Bondoc, SAGIP Party-list Rep. Rodante Marcoleta subong man ang nakapreso nga si KOJC founder Pastor Apollo Quiboloy.
Apang, wala nasambit ang panglan sang isa pa ka Senatorial candidate sang partido nga si anay Executive Secretary Vic Rodriguez.
Suno kay VP Sara, nagapati siya nga yara sa publiko ang gahum nga bag-uhon ang dalagan sang pungsod pinaagi sa pagboto sa mga kandidato nga nagakadapat, nagasugid sang matuod, kag mahugod nga magserbisyo.
Matandaan una na nga ginsiling sini sa isa ka press conference sa OVP satellite office sa Bacolod city nga indi siya maga-endorso sang sin-o man nga local ukon national candidates bangud indi maayo ang iya nangin eksperyensya sa nakaligad nga eleksyon sadtong 2022 kag sa baylo ginsiling nga kinahanglan pillion sang mga
botante ang mga kandidato base sa kung ano ang ila nahimo kag indi sa pag-endorso sang sikat nga personalidad.
