Ginpakalain ni Vice President Sara Duterte ang estado sang journalism sa Pilipinas, kasunod sang iya pagbisita sa iya amay nga si anay President Rodrigo Duterte sa The Hague.
Sa interview sa The Hague kay VP Sara, ginpahayag sini nga malayo pa ang kalidad sang journalism sa Pilipinas kun ipaanggid sa international media.
Suno sa Bise Presidente, mas maayo suno sa iya ang pamaagi sang international media sa pagpangita kag pagpresentar sang balita.
Ginhimo ni Duterte ang pahayag matapos siya gin-usisa angot sa pila ka mga media outlets nga ginaalegar nagakuha sang iya mga pahayag sa guwa sang konteksto, nga suno sa iya nagtuga sang negatibo nga pagtan-aw sa iya kag sa iya pamilya.
Ginpanindugan man sini nga indi dapat kwarta ang mayor nga rason sang journalism, bangud kun ini lang ang tuyo, mabudlay na nga may yara sang matuod nga pagbag-o sa pungsod.
Ginpahayag man ni Duterte nga daku nga bulig ang social media bangud nagahatag ini sang oportunidad sa publiko nga makita ang nagkalain-lain nga panan-awan kag kaugalingon nga bersyon sang mga hitabo.
Ginpabutyag man niya ang iya kahadlok sa iya ginsiling nga nagabag-o ang paghatag sang igtalupangod sang pila ka mga Pilipino, kag nagpanawagan sang pag-appreciate sang mga kinaiya pareho sang pagkabayanihan, discipline, kag resilience.
