Ginhatagan sang pagtamod ni anay Presidential Legal Counsel Salvador Panelo, ang preparasyon sang kampo ni Vice President Sara Duterte nga atubangon ang impeachment trial batuk sa iya.
Suno kay Panelo, nakapreparar ang legal team ni VP Sara para sa pagahiwaton nga hearing, kag sigurado nga atubangon niya ini nga nagakadlaw, maisog kag may bastante nga ikasarang.
Kadungan sini, ginbatikos man sang anay tagpamaba ni anay Pangulong Rodrigo Duterte ang ginapahayag wala pagrespeto sang mga mamalidha sa tingog sang publiko subong man ang ginahinyo ni Pangulong Ferdinand Marcos Jr. nga untatan na ang nasambit nga tikang bangud magaresulta lamang ini sang pagkawasak kag indi magahatag sang benepisyo sa mga Pilipino.
Ginalauman man sini nga buliganan si VP Sara kag ang pagsako sa proseso indi na sang bag-o bangud hawid suno diri sang ‘anti-forces’ ang numero.
Nagpanindugan man si Panelo nga wala sang iban nga tinutuyo ang impeachment kundi waskon kag higkuan ang reputasyon ni VP Sara kag buligan siya nga ma-disqualify sa 2028 presidential elections, bilang isa ka kandidato.
Samtang, nagapati naman ang abogado nga ang nasambit nga tikang sang mga kongresista magapadako lamang sa suporta nga mabaton sang bise presidente nagikan sa mga Pilipino.
Nagapati man si Atty. Panelo nga wala sang kamatuuran ang mga grounds sang impeachment nga ginplastar sang mga mamalidha batuk sa Vice President.
