Suportado ni Vice President Sara Duterte ang panawagan para sa “independence” sang mga institusyon nga una nga gin-anunsyo ni Senate President Alan Peter Cayetano kasunod sang pagkadakop kay Senador Jinggoy Estrada bangud sa plunder may kaangtanan sa flood control scandal.
Sa isa ka video statement, ginpahayag ni VP Sara nga nagapati siya nga dapat amligan ang kahilwayan sang mga institusyon, lakip na indi lamang ang Senado kag Kamara bilang mga institusyon kundi pati man ang tagsa ka Senador kag katapo sang manubo nga kamara.
Suno sa iya, dapat hilway ang mga katapo sang duha ka assembly sa paghimo sang ila mga katungdanan nga wala sang pamahog, pag-ipit ukon ano man nga sahi sang pagpamahog.
Dugang pa ni Duterte, sa baylo nga tutukan ang matuod nga problema nga gina-atubang sang mga Pilipino, ginagamit ang poder agud mapahipos ang tingog sang mga nagapamatok.
Ginbuyagyag man niya nga ang gobyerno nga nahadlok sa pagbato wala nagapakita sang kabakod, kundi nagapakita ini sang pagkadula sang pagsalig, nga makita sa direksyon nga ginakadtuan sang aton pungsod.
Kalakip na suno sa iya ang mga pagtinguha nga lainon ang atensyon gikan sa lehitimo nga mga pamangkot nahanungod sa kontrobersiya sa flood control projects, ang pagbalewala constitutional safeguards para sa pagpasanyog sang “politically motivated” impeachment kag ang wala untat nga pagpasanyog sang mas daku nga gahum sa politika nga natago sa likod sang Charter Change (Cha-Cha).
