Waitress, nagreklamo sa Roxas City PNP matapos gindumog kag gingan-it sang iya amo sa isa ka bar

ROXAS CITY – Nagreklamo sa Roxas City Police Station ang isa ka waitress matapos nga gindumog sang iya nga amo sa isa ka bar sa Legaspi Street, Roxas City.

Ang tagreklamo ang ginkilala nga si Mary Jane Araneta, 28 anyos kag residente sang Barangay Libas, sining siyudad.

Base sa reklamo ni Araneta, samtang nagapahuway ini sa VIP-room sang nasambit nga bar matapos siya ang nag-inom, hinali na lamang ini ginpalapitan ni Evelyn Ponsaran, 40 anyos sang Barangay Banica, sining siyudad kag ginaalegar gindumog kag gingan-it ang iya buhok.

Dugang pa nga alegasyon ni Araneta nga wala man mahatag ni Ponsaran ang iya nga sweldo.

Bangud sang natabo, nagpaidalom sa medical examination si Araneta kag ginpakamaayo sini nga iparekord sa pulisya ang natabo.