ROXAS CITY – Ang wala pag-angkon sang koordinasyon kag nagakaigo nga information dissemination sang gobyerno probinsiyal sa mga Local Government Units (LGU’s) ang rason sang pagsalagisag sa pagpatuman sang pila ka mga pagsulundan sa enhanced border restriction, kasunod sang kontrobersyal nga coronavirus disease ukon COVID-19.
Ini ang nangin pahayag ni City Councilor Albert Gregory Potato sang mainterview sang Bombo Radyo.
Sa pagkamatood kay Konsehal Potato nga mas mahinay maghulag ang gobyerno probinsiyal bangud mas nauna pa nga magpaguwa sang Executive Order si Mayor Ronnie Dadivas nga istrikto nga nagapatuman sang border restriction sa mga boundaries sa syudad sang Roxas matapos naglapta ang makamamatay nga COVID-19.
Suno sa opisyal nga dapat kuntani ang provincial government ang magpanguna, apang mas nauna pa nga magpaguwa sang EO ang alkalde bilang preventive measure agud mahatagan proteksyon ang mga residente sang syudad.
Ginpahayag pa ni Potato nga kuntani antes nagpaguwa sang EO si Governor Esteban Evan Contreras II, ginpatawag sini sa isa ka sinapol ang mga alkalde para ang mga local chief executives ang maga-impormar sa mga barangay kapitanes sa ila barangay sa mga pagsulundan nga igapatuman.
Apang wala sang information dissemination kag koordinasyon sa tunga sang gobernador kag mga alkalde rason nga nagtuga ini sang confusion kag failure sa ginapatuman nga mga pagsulundan.
Nahibaluan pa nga wala man nakabaton sang kopya ukon hard copy sang mga EO ukon memorandum circular sang gobyerno probinsiyal ang gobyerno sang syudad bisan ang DILG -Roxas City.
