ROXAS CITY – “Wala na kami makaon, nagahigda lang kami sa karton kag gapanghulam electric fan”.
Ini ang ginpahayag sang isa sa kapin sa 21 ka mga Capizeño nga mga Locally Stranded Individuals ukon LSI’s nga na-stranded sa Batangas Port sa exclusive interview sang Bombo Radyo.
Suno kay Ivan Biogos, 37-anyos sang Barangay Bato-Bato, Mambusao, Capiz nga halos wala na sila sang kwarta kun sa diin ang iban sa ila ginabaligya na lamang ang ila mga kagamitan kapareho sang cellphone, alahas kag iban pa para may ibakal lamang sang pagkaon.
Mahibaluan nga nagpadulong sila sa Caloocan sadtong Agosto 2 para kuntani sa ila sudlan nga trabaho kun sa diin nagpaidalom sila sa 14 day quarantine.
Apang, sang nagtakop na ang ila nga pagpaidalom sa quarantine gilayon man nga nag-untat ang operasyon sang ila kumpaniya nga pagasudlan kuntani sa ila nga pagbalik.
Bangud diri, nadesisyunan nila nga magpauli na lamang sa probinsya rason nga namangkot sila sang mga nagakaigo nga rekisitos sa Starlite (Roro Vessel) para magpauli na lamang kuntani diri sa probinsya.
Gilayon naman sila nagpadulong sa Batangas Port sadtong Agosto 18 matapos nga nahikut na nila tanan nga kinahanglanon nga mga rekisitos sa ila pagpauli magluwas lamang sa Letter of Acceptance nagikan sa LGU’s kag approval ni Governor Esteban Evan Contreras.
Apang, dismayado sila matapos nga temporaryo ginpauntat ang biyahe sang amo nga roro vessel padulong sa probinsya.
Kasunod sini, nagtawag sila sa talatapan sang Provincial Disaster Risk Reduction and Management Office para magpangayo kuntani sang bulig kag ipahibalo ang ila sitwasyon didto sa Batangas Port.
Ginpahayag pa ni Biogos nga makapila ka beses na sila nagtawag sa PDRRMO apang ginapahulat lamang sila bangud ginatipon pa sang amo nga talatapan ang mga LSI’s nga magapauli sa probinsya.
Dismayado man sila bangud halos adlaw-adlaw sila nagatawag kag nagapakitluoy nga makapauli na kuntani apang sa baylo nga buligan sila ginapahayag nga daw kasubong ginapaingtan pa sila sang PDRRRMO.
Dugang pa sini nga nagpakig-angut man sila sa lokal nga gobyerno kag MDRRMO sa Mambusao kun sa diin ginpanugyanan sila nga sugaton sang ambulansya sa Caticlan apang indi pa matigayon bangud wala sang approval nagikan sa gobernador.
Sa karon, nagaapelar si Biogos nga kuntani mahimuan sang pamaagi sang gobyerno probinsyal nga mapadasig ang ila pagpauli sa probinsya bangud ginapahayag nga indi sila mapatay sa COVID-19 sa baylo mapatay sila sa gutom.
Mahibaluan nga halos isa ka semana na sila nagatinir sa Batangas Port kun sa diin nagahigda na lamang sila sa karton nga amo ang nagaserbi nila nga higdaan kag ang iban wala na sang makaon.
