ROXAS CITY – Ginatugyan nalang sang Roxas City Council sa Chairman sang Committee on Barangay Affairs ang pagahimuon nga aksyon angut sa mga wala makabaton nga mga barangay sang insentibo gikan kay City Mayor Ronnie Dadivas sang nakaligad nga Disyembre 2020.
Ini ang ginpahayag ni City Councilor Midelo Ocampo sang mainterview sang Bombo Radyo Roxas.
Suno kay Ocampo, matapos gintalakay sa ginpatigayon nga Committee Hearing ang amo nga reklamo, ginpakamaayo nga itugyan nalang ini sa Chairman sang Committee on Barangay Affairs kag Liga ng mga Barangay President nga si Mr. Virgilio Yoyo Santos agud matutukan ang nasambit nga problema kag agud may yara sang pasabton nga mga konsehales sa tion nga may hibaluon ang rason kun ngaa wala sila nakabaton.
Ginkumpirmar man ni Ocampo nga nakapapasar sila sang Supplemental Budget sang nagligad nga tuig 2020 nga naglab-ot sa masobra P48M para sa insentibo nga igahatag sa mga Barangay Councils, Barangay Tanod kag Barangay Health Workers apang ginkakibot sini ang nabaton nga reklamo nga napaslawan ang iban diri nga makabaton sang nasambit nga insentibo.
Ginpahayag pa sini nga wala man nalakip sa ginpapasar nga insentibo nga may yara sang balasehan kun sin-o gid lamang ang makabaton kabangdanan nga ginkatingala sini ang nangin resulta.
