ROXAS CITY – Malaka lamang ang nagabiyahe nga mga public utility vehicles (PUV’s) kasunod sa pag-downgrade na sa General Community Quarantine (GCQ) sang probinsiya sang Capiz humalin sadtong Mayo 1, 2020.
Ini ang natalupangdan sang Bombo Radyo News Team sa pagpadulong sa Roxas City Integrated Transport Terminal.
Sa pagpadulong sang hubon sa amo nga terminal, wala halos sang nagabiyahe nga mga jeep kag duha ka mga van lamang ang nasiplatan nga nagabiyahe.
Suno kay Jobert Badoles, driver sang van nga may biyahe Pilar-Roxas City vice versa, hugot ang ila ginapatuman nga social distancing sa mga pasahero.
Suno diri nga kun sadto sarang sila makapasakay sang 18 ka mga pasahero, sa subong tubtob lamang sa 8 ang ila mahimo mapasakay.
Ginapatuman man sang mga ini ang ‘no face mask, no travel’ policy kag gina-sanitize ang mga pasahero antes magsakay gamit ang alcohol.
Ginkompirmar man sini nga nagpasaka sila sang 20 pesos sa pletehan kag ginapaathag man nila ini sa mga nagasakay butang nga ila man nga nahangpan.
