ROXAS CITY -Wala sang nangin problema sa paglanding sa Roxas City airport sang ginasakyan nga private plane ni Patroceño Don Chiyuto, CEO sang Chiyuto Creative Wealth Document Facilitation Services (CCWDFS) kahapon.
Ini ang gin-athag sang Public Information Officer sang Civil Aviation Authority of the Philippines (CAAP)-Capiz nga si Arjay Villarde.
Suno kay Villarde matapos naghugpa sa pahugpaan ang nasambit nga eroplano, nagpanaug ang duha ka piloto kag isa ka mekaniko dala ang isa ka maleta.
Nagdumdum ang tagdumalahan nga wala pa nagpanaug si Chiyuto bangud ginahulat sini ang magasugat sa iya.
Matapos ang 15 minutos ginkakibot na lamang sang airport personnel nga nagpangayo sang clearance ang piloto nga magabalik na sila sa Manila.
Kasunod sini ang pagpasaka sang maleta kag ang pagtake off sang private plane sang CEO sang Double your Money Scheme pabalik na sa Metro Manila.
Wala man sang ihibalo si Villarde kun ano ang unod sang maleta kag wala man sila nagpangusisa kun ano ang rason ni Chiyuto nga wala ini nagpanaug sa eroplano.
Apang ba-se sa paathag ni Villarde nga tanan nga kargamentos kag bagahe sang mga pasahero pribado ukon commercial plane man ang sakyan, ginatsekyar kag nagaagi sa x-ray machine, nga protocol na sang eroplano.
Pananglitan ma-detect sang machine nga nagaunod sang madamo nga kuwarta ang bag ukon maleta, gilayon ini nga i-hold kag pa-explikahon kun diin naghalin ang tuman kadaku nga kantidad nga dala.
Samtang aminado si Villarde nga nagtuga sang tensyon ang wala pagpanaug ni Chiyuto sa ginasakyan nga eroplano sa diin una nga report nga naglapta nga ginhold ini sang airport.
Bangud diri personal sini nga gin-atubang ang mga supporters sang Double your Money Scheme CEO kag ginpasiguro nga wala sang rason para i-hold ang pagpanaug ni Chiyuto sa eroplano.
