ROXAS CITY – Gin-athag karon sang pamunuan sang DepEd Capiz Division nga wala sang balayaran sa graduation rites sang mga graduating students.
Ginpahayag ni Dr. Miguel Mac Aposin nga kinahanglan ipatuman ang ‘’No Collection Policy’’ sa nagahilapit nga pagtakop sang School Year 2022-2023.
Suno sa opisyal nga pagakuhaon ang mangin kagastuhanon sa seremonya sa pondo sang maintenance and other operating expenses (MOOE).
Ipatuman sang Department of Education Capiz Division nga wala gid dapat sang alamutan,kag kung may nakasugtanan man ang mga ginikanan, dapat ini ang boluntaryo kag wala sang pinilitay.
Ginalikawan man sa mga manunudlo nga mag-entra sa pagdesisyon pag-abot sa alamutan nga kantidad kag ipadala nga mga pagkaun sa mga ginikanan.
Samtang school uniform naman ukon toga ang ginapahanugutan nga suksukun sa adlaw sang gradwasyon nga natalana sa Hulyo 10 -14 2023.
Bukas naman ang opesina sang Department of Education Capiz Division sa mga ginikanan nga magareklamo may kaangtanan sa mga eskwelahan nga wala nagasunod sa pagsulundan.
