ROXAS CITY – Ginpaathag sang Roxas City Communication Group (RCCG) nga wala sang halo nga pamulitika kag serbisyo lamang para sa pumuluyo ang food security program ukon bugas para sa taga Roxas, ini matapos nagreklamo ang pila ka pumuluyo nga wala na sila sa listahan sang mga ginpanghatagan.
Sa interview sang Bombo Radyo kay Mr. Melvin Galagate, Tagpamuno sang RCCG, suno diri luyag tadlungon sang Roxas City government ang alegasyon nga may pamulitika ang pagpanghatag sang 15 kilos nga bugas bangud wala man ini sila kakilala sang tanan nga pumuluyo sang kada barangay kag wala sila makahibalo kun ang mga ini kontra partido ukon apin.
Dugang pa sini nga indi ang city government ang nagapili sang pagahatagan kundi nagaagi ini sa assessment sang City Social Welfare and Development Office (CSWDO) kag koordinasyon sa opisyales sang barangay nga amu ang nagapili sa pinakapigado kag gakinahanglan nga pumuluyo.
Gintuad ni Galagate nga rason sa wala nakabaton ang iban sang 15 kilos nga bugas bangud nakabalik na ang mga ini sa trabaho kag sarang na nga masustiner ang pang-adlaw-adlaw nga kinahanglanon, indi pareho sadtong pandemya nga madamo ang nadulaan sang trabaho.
Ginkumpirmar man sini nga may ginkakas na sa listahan nga gintudlo sang CSWDO kag Brgy. officials nga may ikasarang na sa pagsustiner sa ila pamilya.
Bukas naman suno diri ang CSWDO sa mga reklamo kag maga-asister kun kinahanglan pa buligan ang tagreklamo ukon indi.
Ginpahayag nga tubtob Disyembre pa ang pagpanghatag sang bugas kag magapabilin ini sa 15 kilos.
