POBALACION NORTE, Sigma, Capiz – Arestado ang isa ka wanted person sa kaso nga murder sa Barangay Poblacion Norte, Sigma Capiz.
Ang suspek ginkilala sakay alias John, 38-anyos, kag residente sang Barangay Mangoso, Sigma, Capiz.
Sa interview sang Bombo Radyo kay Police Major Narciso V Sables Jr., Officer in Charge sang Sigma Municipal Police Station, iya ginpahayag nga paagi sa impormasyon nga ginhatag sang isa ka concerned citizen, natigayon ang madinalag-on nga pagaresto sa suspetsado.
Suno kay Sables paagi sa beripikasyon, nakumpirma nga may yara sang aktibo nga warrant of arrest ang suspetsado sa bahin sang Quezon City, nga may petsa Nobyembre 29, 2016.
Pahayag pa niya, nangin sunod nila nga tikang ang pagkuha sang kopya sang warrant of arrest halin sa issuing court, kag base sa amo nga dokumento, indi mahimo nga makapag-bail ang suspetsado.
Dugang pa sang hepe, padayon ang pagmonitor sang Sigma PNP sa iban pa nga mga wanted person nga may yara sang mga ginaalegar nga nahimo nga krimen.
Samtang, yara na sa kustodiya sang Sigma PNP ang suspetsado para sa nagakaigo nga proseso.
Sa karon ginapanawagan man sang hepe sa tanan nga may yara sang pending nga kaso, warrant of arrest kag ihibalo sa mga persona nga may yara sang warrant of arrest mahimo nga mag surrender ukon maghatag sang impormasyon sa katapo sang Sigma PNP ukon iban pa nga law enforcement officer agud nga mabuligan sila kag mahatagan ang hustisya sa pamilya sang biktima.
