Arestado sang mga kapulisan ang isa ka wanted person matapos masapwan sa Barangay Poblacion, Sapian, Capiz kag serbihan sang Warrant of Arrest.
Ang arestado amo si alyas “Roll,” 57 years old, residente sang Barangay Gamayan, Sapian, Capiz.
Sa interview sang Bombo Radyo Roxas kay PLT. Steve Ian Bautista, Officer-in-Charge sang Sapian Municipal Police Station, iya ginpahayag nga nakabaton ang kapulisan sang Warrant of Arrest batok sa nasambit nga persona, gani nagpatigayon sila sang operasyon para sa iya pagdakop.
Suno pa sa iya, antes ang pagserbe sang warrant, nagconduct ang kapulisan sang intelligence monitoring kag nahibaluan nga yara ang subject sa Barangay Poblacion.
Gani, gilayon ini nga ginserbihan sang Warrant of Arrest kag nadakop sang mga kapulisan.
Ang warrant gin-isyu sang korte bangud sa paglapas sang Section 7-A sang Republic Act 9175 ukon Chainsaw Act of 2002.
May yara man sang ₱18,000 nga rekomendado nga piyansa para sa temporaryo nga kahilwayan sang akusado.
Pahayag pa sang natungdan, wala na sang iban pa nga kaso nga ginapangatubang ang nasambit nga persona kag matapos ang iya pag-aresto, nakagwa ini matapos makapiyansa.
Nagpasalamat naman ang Sapian MPS sa kooperasyon sang mga pumuluyo, ilabi na sa paghatag sang mga impormasyon nga nagabulig sa kapulisan sa pagdakop sang mga wanted persons.
Ginapanawagan man sang kapulisan ang publiko nga kun may nahibaluan nga persona nga may yara sang Warrant of Arrest, magpakig-angot gilayon sa pinakamalapit nga police station ukon sa Sapian MPS kag maghatag sang impormasyon agud mabuligan ang kampanya batok sa mga wanted person.
