BALASAN, ILOILO – Gintadlong sang hepe sang Balasan PNP ang report nga isa ka Capizenio ang nadakpan nga wanted person sang Abril 1, 2021 sa isa ka barangay sa banwa sag Balasan, Iloilo nga naghikog sa sulod sang selda.
Ginpahayag ni Police Major Samuel Vipinosa, hepe sang Balasan PNP nga residente sang Barangay Dayhagan, Carles, Iloilo si Alyas Danny nga nagapangatubang sang kaso nga 2 counts of rape kag indi residente sang Barangay Dayhagan, Pilar kasubong sa nagaguha nga report.
Ginklaro man sang opisyal nga sa banwa lamang sang Pilar nakomiter ni alyas Danny ang krimen kag nagpanago sa isa ka barangay sang Balasan, Iloilo sa diin ini nadakpan sang Huwebes Santo sang gintingub nga operasyon sang Anti Kidnapping Group-Iloilo kag Balasan PNP.
Suno kay Vipinosa nga nagaisahanon lamang sa karsel si Alyas Danny kag natalana kuntani nga i-remit sa Bureau of Jail Management and Penology (BJMP) sa Barangay San Jose subong nga adlaw.
Nahibaluan nga sang gab-I antes nasapwan nga nagabitay sa sulod sang CR si Alyas Danny nakit-an pa ini sang police on duty nga nagapungko kag wala nagakatulog nga kasubong may madalum nga ginapanumdum.
Ginpanugyanan pa ini sang pulis nga magtulog para makapahuway.
Apang sang nagpadulong sa police station ang live-in partner ni alyas Danny, gintuad sini kay Vipinosa nga nagbuhi na sang pahayag ang biktima nga pananglitan madakpan ini sang mga pulis kag mabilanggo, paga-utason na sini ang iya nga kabuhi.
Nahibaluan nga wala na sang plano ang pamilya ni alyas Danny nga ipaidalum sa autopsy ang bangkay sang ila himata bangud nagapati sila nga wala sang foul play sa kamatayon sini.
Samtang suno kay Vipinosa nga maka-apat na ka beses nga may naghikog nga preso sa karsel sang amo nga police station kag nadugangan subong sang isa.
