Arestado ang isa ka wanted person nga nagapangatubang sang kaso nga reckless imprudence resulting to homicide sa Balasan, Iloilo.
Nakahunong na karon sa karsel ang akusado nga si Rolin John Casabuena 26-anyos sang Barangay Zaragosa, Balasan, Iloilo matapos serbehan sang warrant of arrest sang gintingub nga pwersa sang Sapian kag Balasan PNP.
Gin-isyu kag ginlagdaan ni Judge Jovey Paclibar Valenzuela sang MCTC Sigma-Sapian-Jamindan ang warrant of arrest ni Casabuena nga napetsahan Abril 7, 2021.
Nagrekomendar ang korte sang P60,000 nga pyansa para sa iya temporaryo nga kahilwayan.
Nag-ugat ang kaso kag pagpapanaug sang warrant of arrest kay Casabuena sa pagbunggo-patay sini sa isa ka tigulang sa Barangay Maninang, Sapian sang nagligad nga mga binulan.
