Gin-anunsyo ni Presidente Ferdinand “Bongbong” Marcos Jr., nga ginpaguwa na ang arrest warrants batok kay anay Ako Bicol Representative Zaldy Co kag 17 ka iban pa nga mga indibidwal gikan sa Department of Public Works and Highways (DPWH) kag Sunwest Corporation, may kaangtanan sa gina-alegar maanomaliya sa P289-million nga flood control project sa Oriental Mindoro.
Sa iya opisyal nga pahayag, ginmanduan sang Presidente ang mga law enforcement agencies nga gilayon nga ipatuman ang pag-aresto kag siguraduhon nga ini ang ginapatuman sang husto, madasig, kag suno sa kasuguan.
Ginpasalig man sini nga tapuson niya ang iya gin-umpisahan nga imbestigasyon sa maanomaliya sa flood control kag batuk sa korapsyon.
Dugang pa niya, indi sila mag-untat sa paghimo sang mga tikang batuk sa korapsyon, nga sa pihak sang kadugay, nagbunga na.
Matandaan, una na nga ginpasakaan sang Office of the Ombudsman sang kaso corruption kag malversation of public funds batuk kay Co, pila ka mga opisyales sang DPWH-MIMAROPA, kag mga direktor sang Sunwest Corporation sa Sandiganbayan.
Nahibaluan nga ini ang una nga batch sang mga kaso may kaangtanan sa flood control kickback scheme nga ginmitlang sang Presidente sa iya ika-apat nga State of the Nation Address.
