Magapatigayon ang We Care for Humanity (WCH) sang isa ka virtual Peace Summit sa masunod nga semana nga i-host sa Qatar sa ika-tatlo nga tion.
Suno kay Bombo Joseph Timothy Rivera, International Correspondent sa Qatar kag Country Director for Qatar sang We Care for Humanity, iya ginpahayag nga katuyuan sang amo nga lihok nga iduso ang kalinong kadungan sang ginapatigayon nga ceasefire talks sa tunga sang United States kag Iran sa Islamabad nga ginapangunahan sang Pakistan.
Pahayag niya, ang matuod nga epekto sang kinagamo ang nagakabatyagan sang mga ordinaryo nga mga tawo kasubong sang pagbakwit, pagkadula sang trabaho, pagmahal sang mga balaklon, paghinay sang ekonomiya nga may pangkalibutanon nga epekto kag iban pa.
Ginganyat sang organisasyon ang mas mabakod nga accountability kag paggamit sang diplomasya agud malikawan ang paglala sang mga kinagamo.
Ginhatagan man pagtamod sang We Care for Humanity ang sitwasyon sang mga migrant workers, kalakip ang mga Pilipino sa Qatar, nga naapektuhan sang wala kasiguraduhan sa trabaho kag remittances tuga sang pangkalibutanon nga tensyon.
Nahibaluan nga nagsugod ang una nga peace talks sang organisayon sang 2023 kag ginsundan naman sang 2025 kag ika-tatlo subong nga tuig.
Ang amo nga non-profit organization gintukod sang 2011, nga nakasentro sa paghduso sang kalinong kag mga katuyuan sang United Nations Sustainable Development Goals sa masobra 20 ka mga pungsod sa kalibutan.
Nagalaum ang natungdan nga mauntat na ang kinagamo sa diin man nga bahin sang kalibutan agud nga indi makompromiso ang kabuhi sang mga tawo.
