ROXAS CITY – Dako ang potensyal sang Western Visayas nga mangin source sang renewable energy sa pungsod.
Sa interview sang Bombo Radyo kay Ms. Lourdes S. Arciaga Division Chief sang Energy Resource Development and Utilization Division sang Department of Energy Visayas Field Office, ginpahayag sini nga ang Rehiyon VI ang mahimo nga makuhaan sang renewable energy bangud halos tanan suno diri nga mga resources may yara ang Western Visayas.
Ang renewable energy, ang bag-o nga enerhiya ukon ginakabig nga isa ka natural replenishing nga makuhaan kag nagahimo sang zero emissions.
Kalakip diri nga makuhaan sang enerhiya amu ang solar, wind, geothermal, biomass, biowaste kag hydroelectric.
Dugang pa ni Arciaga may yara na sang mga existing project development sa rehiyon para sa hydroelectric kag ginapahayag nga isa ini ka dako nga proyekto.
Mahibaluan nga sang damlag lang, nagpatigayon ang ahensya sang hydro resource assessment sa tatlo ka mga banwa sa Capiz nga ginakahamtangan sang Panay River nga ginakalakipan sang Jamindan, Mambusao kag Panitan.
Isa man sa mga proyekto nga nakabulig na sang dako sa pila ka mga lugar amu ang wind projects nga nahamtang sa probinsya sang Aklan kag Guimaras.
Angut sini, prayoridad man sa karun suno kay Arciaga sang gobyerno ang offshore wind project nga kung sa diin ginatun-an na ini karun sang DOE kag World Bank.
Samtang ginpahayag man sini nga indi lang kinahanglan nga magdepende sa mga imported nga gatong nagikan sa iban nga pungsod, rason nga hugot nila nga ginaduso ang renewable energy nga dako ang mabulig sa tanan.
